Un sikólogo i un sikiater tin hopi en komun. Pero tambe tin sierto diferensianan hopi importante entre e dos profeshonnan aki.

Pa kuminsa un sikiater a studia medisina i un sikólogo a studia sikología. Esei ta nifika ku un sikiater tin pèrmit pa preskribí remedi na un kliente. Sikólogonan en general no tin e pèrmit aki. Pero tin eksepshon. Por èhèmpel, na e siudat ‘New Mexico’ na Merka, sikólogonan tambe tin mag di preskribí remedi. Tin un diskushon mundialmente tokante e tema aki.

Hopi ta esnan ku ta opiná ku un sikólogo no tin sufisiente konosementu di neuroanatomía, fisiología, farmakología i sikofarmakología. I esaki ta pone ku nan no ta medikamente kualifiká. Pero awendia na sierto siudatnan na Merka sikólogonan por tuma un kurso di sikofarmakología, kual ta pone ku nan tin mag di preskribí sierto remedinan sikiátriko.

Un diferensia mas ta ku banda di e mente humano, un sikólogo a studia komportashon (behavior) tambe. Ademas, un sikólogo a studia pa hasi tèstnan sikológiko (p.e. tèst di inteligensia, tèst di personalidat, etc.) i un sikiater no. E tèstnan aki ta wordu huzá komo parti di un investigashon sikológiko. Por èhèmpel, si un sikólogo kier sa kon bon un persona por plania, solushona problema, konsentra, rekòrda, etc. e ta hasi un tèst spesial pa midi esakinan.

Di e otr’un banda, tur e dos profeshonnan aki por konsistí di duna sikoterapía na e pashèntnan. Durante un sikoterapía e sikólogo of sikiater ta papia ku e pashènt tokante su problema. Tin diferente tipo di sikoterapía kaminda e atenshon ta riba kognishon (cognition) i/of komportashon (behavior) di un pashènt. Manera ariba menshoná, e parti di komportashon ta wordu hasí prinsipalmente dor di un sikólogo.

Sikólogo na Hulanda
Si bo ke bira un sikólogo na Hulanda, bo mester hasi un estudio bachelor na universidat. Esaki ta dura tres aña. Ora bo kaba e estudio aki, bo mester hasi un maestría (masteropleiding). Ora ku bo kaba esaki, bo ta un sikólogo basiko. Despues di por lo menos tres aña di eksperensia praktiko, bo por wordu selektá pa hasi un estudio pa bira GZ-psycholoog i hanja un LOGO-verklaring.

E estudio ta dura dos aña i ora ku bo terminá esaki bo ta wordu registrá den e asina yamá ‘BIG-register’. Esaki ta nifiká ku bo titulo komo GZ-psycholoog ta protehá i un persona no tin pèrmit pa yama su mes un GZ-psycholoog, si e no a hasi e estudio. Bo por haña kastigu pa esaki.

Komo GZ-psycholoog bo por traha den tur sektor di gezondheidszorg (komo sikólogo basiko esaki no ta posibel). Un GZ-psycholoog por traha independientemente tambe. Un sikólogo basiko mester traha bou di un GZ-psycholoog. Si bo ke sigui eduká bo mes, bo por hasi un estudio mas i bira sikólogo klíniko.

Sikiater na Hulanda
Pa bo bira un sikiater na Hulanda, bo mester hasi e estudio di medisina (geneeskunde) na universidat. Esaki ta dura seis aña. E tres prome añanan ta bachelor i e tres lastu añanan ta maestría. Ora ku bo kaba ku esaki bo ta un dòkter basiko. Si bo ke sigui studia pa bira sikiater, bo mester solisita na un hòspital akademiko of un hòspital sikiatriko en general pa bo haña un luga.

Ora ku bo haña un luga, bo ta kumisa ku un estudio pa spesialisá bo mes den sikiatría. Durante e estudio di kuater aña i mei aki bo ta wordu eduká pa bira un sikitar i sikoterapeuta. Durante e estudio bo ta okupá bo mes kaba komo sikiater den praktika. Despues bo por laga registra bo mes den e asina yamá ‘BIG-register’, manera un GZ-psycholoog tambe ta hasi.

Check mi blog akinan & komparti esaki ku bo amigunan.